اسلام آباد: وزیراعظم شہباز شریف نے کہا ہے کہ معاشی طور پر پسماندہ طبقے کو ریلیف فراہم کرنا حکومت کی اولین ترجیح ہے، آئندہ مالی سال میں آٹے، چینی، گھی، خوردنی تیل، دالوں اور چاول پر ٹارگٹڈ سبسڈی دی جائے گی۔

وزیرِ اعظم شہباز شریف سے وزیرِ تخفیفِ غربت و سماجی تحفظ شازیہ عطاء مری نے ملاقات کی، جس میں موجودہ ملکی سیاسی صورتحال پر گفتگو ہوئی۔

"The government is committed to providing relief to the underprivileged segment of the society". Prime Minister Shehbaz Sharif pic.twitter.com/iycObsAG6N

— PML(N) (@pmln_org) June 21, 2022

ملاقات میں شازیہ مری نے وزیرِ اعظم کو بے نظیر انکم سپورٹ پروگرام کے جاری منصوبوں پر پیش رفت سے آگاہ کیا۔

اس موقع پر وزیراعظم شہباز شریف کا کہنا تھا کہ پسماندہ طبقے کو ریلیف فراہم کرنا اولین ترجیح ہے، آئندہ مالی سال میں آٹے، چینی، گھی،خوردنی تیل، دالوں اور چاول پر ٹارگٹڈ سبسڈی دی جائے گی، تمام متعلقہ وزارتیں یہ یقینی بنائیں گی کہ سبسڈی مستحق و پسماندہ افراد تک پہنچے۔

وزیرِ اعظم نے ٹارگٹڈ سبسڈی کیلئے وزارتِ تخفیفِ غربت و سماجی تحفظ کو وزارتِ خزانہ اور وزارت صنعت و پیداوار سے تعاون کے بعد جامع حکمتِ عملی مرتب کرنے کی ہدایات بھی کی۔