پشاور:خیبرپختونخوا حکومت نے ہیلی کاپٹر کے استعمال کے حوالے سے قانون بنالیا، آج صوبائی اسمبلی میں پیش ہوگا۔

خیبرپختونخوا حکومت نے وزیراعلیٰ اور وزراء کی مراعات میں اضافے کا قانون بنا لیا، اس حوالے سے خیبرپختونخوا اسمبلی کا اجلاس آج طلب کیا گیا ہے جس میں بل پیش کیا جائے گا۔

بل کے مطابق وزیراعلیٰ خیبرپختونخوا اور وزراء سرکاری خرچے پر ہیلی کاپٹر اور ہوائی جہاز استعمال کر سکیں گے۔

قانون کے تحت وزیر اعلیٰ اپنے لئے اور وزراء کے استعمال کیلئے ہیلی کاپٹر کرائے پر لے سکیں گے۔

اس کے علاوہ وزیر اعلیٰ خیبرپختونخوا کی صوابدید ہوگی کہ وہ جہاز یا ہیلی کاپٹر پاکستان ایئرفورس سے لیں یا مارکیٹ سے اور وزیراعلیٰ وہ جہاز یا ہیلی کاپٹر وزراء اور سرکاری افسران کو بھی دینے کے مجاز ہوں گے۔

اس سے پہلے سابق وزیراعظم عمران خان کئی جلسوں میں خیبرپختونخوا کا ہیلی کاپٹر استعمال کرچکے ہیں۔