وزیراعظم شہباز شریف کے معاون خصوصی عطاء اللہ تارڑ نے پاکستان تحریک انصاف (پی ٹی آئی) کا جلسہ رکوانے کے لیے لاہور ہائیکورٹ میں درخواست دائر کردی۔

مسلم لیگ (ن) کے رہنما عطاء اللہ تارڑ نے پی ٹی آئی کا جلسہ رکوانے کے لیے لاہورہائیکورٹ سے رجوع کرلیا۔

عطاء اللہ تارڑ نے اپنے وکیل کے ذریعے ہائیکورٹ میں پٹیشن دائرکی، درخواست میں چیف سیکرٹری، ڈپٹی کمشنر اور تحریک انصاف کو فریق بنایا گیا ہے۔

درخواست میں مؤقف اختیار کیا گیا کہ تحریک انصاف نے 13 اگست کوہاکی گراؤنڈ میں جلسے کا اعلان کیا، کھیلوں کے گراؤنڈز کو سیاسی مقاصد کے لیے استعمال نہیں کیا جاسکتا، جلسے کے لیے آسٹرو ٹرف کو اکھاڑا جارہا ہے، آسٹرو ٹرف کو اکھاڑنے اور بچھانے کے لیے کروڑوں روپے خرچ ہوں گے۔

عطاء اللہ تارڑ نے درخواست میں استدعا کی کہ عدالت ہاکی گراؤنڈ میں پی ٹی آئی کا جلسہ روکنے کا حکم جاری کرے۔