مشترکہ متفقہ اعلامیہ میں کہا کہ ‎اتحاد میں شامل تمام جماعتیں چیف جسٹس سے مطالبہ کرتی ہیں کہ وزیراعلی پنجاب کے انتخاب سے متعلق مقدمے کی سماعت فل کورٹ کرے۔

اعلامیہ میں کہا گیا ہے کہ عدالت عظمیٰ کے تمام معزز جج صاحبان پر مشتمل فل کورٹ سپریم کورٹ بار کی نظرِ ثانی درخواست، موجودہ درخواست اور دیگر متعلقہ درخواستوں کو ایک ساتھ سماعت کیلئے مقرر کرکے اس پر فیصلہ صادر کرے۔

حکمران اتحاد نےاس بات پر زور دیا ہے کہ یہ بہت اہم قومی، سیاسی اور آئینی معاملات ہیں۔

اعلامیہ میں کہا گیا کہ سیاسی عدم استحکام کی بھاری قیمت عوام مہنگائی، بے روزگاری اورغربت کی صورت ادا کر رہے ہیں۔

اعلامیہ میں مزید کہا گیا ہے کہ عمران خان بار بار سیاست میں انتشار پیدا کر رہے ہیں جس کا مقصد احتساب سے بچنا اور چور دروازے سے اقتدار حاصل کرنا ہے۔

حکمران اتحاد میں شامل جماعتیں اس عزم کا اعادہ کرتی ہیں کہ آئین، جمہوریت اورعوام کے حق حکمرانی پر ہرگز کوئی سمجھوتہ نہیں ہوگا۔