آج نیوز کے مطابق 24 برس قبل آج کے دن پاکستان نے بھارتی ایٹمی دھماکوں کے جواب میں اپنی جوہری طاقت کا مظاہرہ کیا تھا۔

دریں اثنا 28 مئی سنہ 1998 کو پاکستان نے بلوچستان کےعلاقےچاغی میں دھماکوں کے ذریعے بھارت کے ایٹمی دھماکوں کا جواب دیا تھا۔

واضح رہے کہ ان ایٹمی دھماکوں کے بعد پاکستان نے مسلم دنیا کی پہلی اور دنیا کی ساتویں ایٹمی طاقت بننے کا اعزاز حاصل کیا تھا۔

تاہم اسی دن کو "یوم تکبیر" کے نام سے یاد کیا جاتا ہے۔

یوم تکبیر: قوم نے پاکستان کے دفاع کے لیے اپنے عزم کا اعادہ کیا، وزارت خارجہ

وزارت خارجہ کی جانب سے جاری کردی پریس ریلیز میں کہا کہ جوہری ہتھیاروں کے تجربوں نے نہ صرف پاکستانی قوم کے پاکستان کی علاقائی سالمیت، آزادی اور خودمختاری کے تحفظ کے عزم کا اظہار کیا بلکہ جنوبی ایشیا میں تزویراتی توازن کو برقرار رکھنے کی خواہش کا بھی اظہار کیا۔

پریس ریلیز میں کہا کہ پاکستان جنوبی ایشیا میں امن و استحکام کے ماحول کے فروغ کے لیے پرعزم ہے اور کسی بھی شکل میں جارحیت یا مہم جوئی کو روکنے کی اپنی صلاحیت کو برقرار رکھتا ہے۔

مزید کہا کہ پاکستان جوہری ٹیکنالوجی کے پرامن استعمال میں اپنے بین الاقوامی تعاون کو مزید وسعت دینے اور جوہری ریگولیٹری معاملات سمیت دیگر ممالک کے ساتھ اپنی مہارت کا اشتراک کرنے کا منتظر ہے۔