چین کے دارالحکومت بیجنگ میں وزیرِ اعظم عمران خان نےآج صبح چینی صدر شی جن پنگ سے اہم ملاقات کی جس کے بعد وزیر اعظم وطن واپسی کیلئے روانہ ہو گئے۔

وزیرِ اعظم عمران خان کی چینی صدر سے ہونےوالی ملاقات میں دو طرفہ تعلقات اور عالمی صورتِ حال پر گفتگو ہوئی۔

ملاقات کے بعد وزیر اعظم اپنا 4روزہ سرکاری دورہ مکمل کر کےوطن واپسی کیلئے ایئر پورٹ پہنچ گئے۔

خیال رہے کہ وزیرِ اعظم عمران خان گزشتہ روز چین کے صدر شی جن پنگ کے ظہرانے میں بھی شریک ہوئے ، جہاں چینی ہم منصب لی کیچانگ سمیت قطری امیر، مصری صدر سمیت دیگر حکام سے ملاقاتیں کیں۔

وزیراعظم ہاؤس کی طرف سے جاری کردہ اعلامیہ کے مطابق وزیراعظم عمران خان نے چینی وزیراعظم لی کو سی پیک اور خصوصی ٹیکنالوجی زونز میں چینی سرمایہ کاری کو بڑھانے کے اقدامات سے آگاہ کیا۔

اعلامیہ میں مزید کہا گیا کہ وزیراعظم نے پاکستان میں چینی شہریوں، منصوبوں اور اداروں کی حفاظت کیلئے حکومت کے اقدامات سے آگاہ کیا۔