وزیراعظم عمران خان کی زیر صدارت منی بجٹ کے حوالے سے وفاقی کابینہ کا خصوصی اجلاس ہوا، جس میں وزیر خزانہ شوکت ترین نے منی بجٹ سے متعلق وزرا ءکو بریفنگ دی۔

وفاقی کابینہ نے سفارشات کے ساتھ منی بجٹ کی منظوری دے دی،جس کی تصدیق وزیر اطلاعات فواد چوہدری کی جانب سے کی گئی ہے۔

فواد چوہدری کا کہنا تھا کہ وفاقی کابینہ نے فنانس بل کی منظوری دے دی جسے اب قومی اسمبلی میں پیش کیا جائے گا۔

کابینہ نے فنانس بل کی منظوری دے دی ہے، اب یہ بل قومی اسمبلی کے اجلاس میں پیش کیا جائیگا۔ https://t.co/S5skxZfxQf

— Ch Fawad Hussain (@fawadchaudhry) December 30, 2021

واضح رہےکہ اپوزیشن نے ایوان میں منی بجٹ پیش کیے جانے کے موقع پر حکومت کا ڈٹ کر مقابلہ کرنے کا اعلان کیا ہے۔

کابینہ اجلاس :ایم کیو ایم کی جانب سے امین الحق نے خدشات وزیراعظم کے سامنے رکھے

ادھر وفاقی کابینہ کے اجلاس کے دوران ایم کیو ایم کی جانب سے وفاقی وزیر امین الحق نے خدشات وزیراعظم عمران خان کے سامنے رکھے۔

ذرائع کے مطابق امین الحق نے ود ہولڈنگ ٹیکس کی مخالفت کرتے ہوئے کہا کہ آئی ٹی سے متعلق آلات پر 10 فیصد ود ہولڈنگ ٹیکس نہ لگایا جائے۔

وزیراعظم عمران خان نے وفاقی وزیر امین الحق کے خدشات کو سنااورمعاملے پر وزیر خزانہ شوکت ترین کو خصوصی کمیٹی بنانے کی ہدایت کی۔