جسٹس عمر عطاء بندیال کی سربراہی میں جسٹس منصور علی شاہ اور جسٹس سجاد علی شاہ پر مشتمل سپریم کورٹ کے 3 رکنی بینچ نے اسلام آباد میں ججز اور بیوروکریٹس کو پلاٹوں کی الاٹمنٹ سے متعلق درخواست پر سماعت کی۔

جسٹس منصور علی شاہ نے دوران سماعت فیڈرل گورنمنٹ ایمپلائز ہاؤسنگ فاؤنڈیشن سے استفسار کیا کہ فاؤنڈیشن کے قانون میں ملازمین کے ساتھ مخصوص افراد کا ذکر ہے، یہ مخصوص افراد کون ہیں؟ جس پر فیڈرل گورنمنٹ ایمپلائز ہاؤسنگ فاؤنڈیشن کے وکیل نے کہا کہ مخصوص افراد کا تعین سپریم کورٹ 2009 کے فیصلے میں کرچکی ہے۔

جسٹس سجاد علی شاہ نے مقدمہ سننے سے معذرت کرلی جس پر سپریم کورٹ کا 3رکنی بینچ ٹوٹ گیا۔

جسٹس عمر عطاء بندیال نے کیس چیف جسٹس پاکستان جسٹس گلزار احمد کو واپس بھجوا دیا۔

یاد رہے کہ فیڈرل گورنمنٹ ایمپلائز ہاوسنگ فاونڈیشن نے اپیل کر رکھی ہے ، اسلام آباد ہائیکورٹ کے فیصلے کیخلاف اپیل کی گئی ہے ۔