لاہورہائیکورٹ کے جسٹس شاہد کریم نے کرکٹ میچز کےدوران ٹریفک کی بندش کےخلاف کیس کی سماعت کی۔

سی ای او پاکستان کرکٹ بورڈ سلمان حسین،سٹی ٹریفک پولیس آفیسر اور ایس پی سیکیورٹی عدالت میں پیش ہوئے۔

سی ٹی او نے عدالت کو بتایا کہ ہوم ڈیپارٹمنٹ کی طرف سے حکم تھا کہ سیکیورٹی کے باعث سٹرکوں پرٹریفک نہ ہو،جس وجہ سے ٹریفک بلاک کی گئی۔

عدالت نے ریمارکس دیئے کہ ایمبولینسیں او فیملیز بھی ٹریفک میں پھنسی رہتی ہیں،اگر کوئی مریض ایمبولینس میں جاں بحق ہوتا ہےتواس کی ذمہ داری کس پرہے؟ اب سموگ سیزن بھی شروع ہو رہا ہے۔

عدالت نے مزیدریمارکس دیئے کہ اگرٹیموں کو قذافی سٹیڈیم کے قریب ہی ٹھہرایا جائے تو شہر بند ہونے سے بچ جائے۔

عدالت نے سی ٹی او لاہورکوٹریفک رواں دواں رکھنے کی ہدایت کرتے ہوئے ہوم سیکرٹری پنجاب کو جواب سمیت 11 اکتوبر کوطلب کرلیا۔