تقریب کی منظر عام پر آنے والی تصاویر میں دولہا جنید صفدر اپنے نانا مسلم لیگ (ن) کے سربراہ نواز شریف، ماموں حسین نواز، اور پارٹی کے رکن اور سابق وزیر خزانہ اسحاق ڈار کے ساتھ دیکھے جاسکتے ہیں۔

جنید سیاہ ٹکسیڈو، بو ٹائے اور سفید پاکٹ اسکوائر میں ملبوس ایک ہینڈسم نوجوان لگ رہے تھے، جبکہ ان کے نانا کوویڈ 19 کے باعث حفاظتی اقدامات کے تحت ماسک پہنے نظر آئے۔

واضح رہے کہ جنید نے سابق سیاست دان سیف الرحمٰن کی بیٹی عائشہ سیف کے ساتھ شادی کی ہے۔

جنید صفدر کے نکاح کے موقع پر ہوٹل کے باہر روایتی ڈھول کا اہتمام کیا گیا، ن لیگی رہنما زبیر گل کی قیادت میں کارکن جمع ہوئے اور خوشی میں بھنگڑے ڈالے۔ جبکہ ہوٹل کے باہر مٹھائی بھی تقسیم کی گئی۔

٭ مریم نواز کی جوڑے کے لیے نیک خواہشات

تقریب میں شرکت نہ کر سکنے والی جنید کی والدہ مریم نواز نے اس موقع کی کچھ تصاویر شیئر کیں اور جوڑے کے لیے نیک خواہشات کا اظہار کیا۔

انہوں نے لکھا، 'اللہ آپ کو ہمیشہ خوش اور خوش رکھے۔'

اس مہینے کے شروع میں تقریب کا دعوت نامہ شیئر کرتے ہوئے مریم نے اعلان کیا تھا کہ وہ 'بے بنیاد الزامات، بوگس مقدمات اور ای سی ایل میں نام' کی وجہ سے تقریب میں شرکت نہیں کر سکیں گی۔

'میں جیل میں تھی جب میری پیاری ماں کا انتقال ہوا اور اب میں اپنے بیٹے کی خوشی میں شریک نہیں ہو سکوں گی۔ لیکن میں اس حکومت سے بیرون ملک سفر کے لیے کوئی درخواست نہیں کروں گی۔ میں معاملہ اللہ تعالیٰ پر چھوڑتی ہوں۔'

مریم نواز نے بیٹے کے نکاح کی تقریب میں آن لائن شرکت کی۔

مریم نواز بیٹے کی شادی کی خوشی میں جاتی امراء میں تقریب کا اہتمام کریں گی۔ جس میں پارٹی کے مرکزی رہنماؤں اور کارکنوں کو مدعو کیا گیا ہے۔

تقریب میں شرکت کے لیے مریم نواز کی صاحبزادی مہرالنساء بھی جاتی امراء پہنچیں گی، جبکہ شہبازشریف اور حمزہ شہباز کی شرکت کا بھی امکان ہے۔

دریں اثنا ، شریف خاندان کی لاہور میں جاتی عمرہ رہائش گاہ بھی شادی کے روایتی قمقموں سے سجی ہوئی ہے۔

٭ ہوٹل کے باہر احتجاج

دوسری جانب جنید کے نکاح کے موقع پر ہوٹل کے باہر احتجاج بھی کیا گیا۔

مقامی ہوٹل کے باہر چند خواتین اور مردوں نے احتجاج کیا۔ مظاہرین نے ہاتھوں میں پلے کارڈز اٹھا رکھے تھے۔ اس دوران وہاں موجود لیگی کارکنوں اور مظاہرین کے درمیان گرما گرمی بھی ہوئی۔

احتجاج کے باعث لینسبرو ہوٹل کے باہر سڑک بلاک کر دی گئی ہے اور انتظامیہ نے پولیس طلب کرلی۔