جمیعت علماء اسلام پاکستان نے سپریم کورٹ میں درخواست دائر کر دی، درخواست الیکشن ترمیمی آرڈیننس 2021 کیخلاف دائر کی گئی۔

سپریم کورٹ میں دائر درخواست میں جے یو آئی نے کہا ہے کہ صدر کے جاری کردہ غیر آئینی اور غیر قانونی آرڈیننس کا نوٹس لیا جائے،الیکشن ترمیمی آرڈیننس 2021 کو فی الفور کالعدم قرار دیا جائے،سپریم کورٹ میں زیر سماعت ریفرینس کے دوران آرڈیننس جاری کرنا توہین عدالت ہے، آرڈیننس جاری کرکے حکومت نے آئین کو روند ڈالا۔

درخواست میں عدالت سے استدعا کی گئی ہے کہ حکومت نے آرڈیننس جاری کرکے پارلیمنٹ اور عدلیہ کے اختیارات کو پامال کیا ہے،حکومت نے آرڈیننس جاری کرکے الیکشن کمیشن کے آئینی اختیارات کو خود استعمال کرنے کی کوشش کی، سپریم کورٹ صدارتی آرڈیننس کو بدنیتی پر مبنی قرار دے کر خارج کرے۔